Château de Chambord
Programme archéologique Caillou & Hofbauer

Deux documents de 1519

Deux documents de 1519

6 septembre

Nomination par François 1er des trésoriers et contrôleurs des bâtiments du château de Chambord.

François, etc (sic).

A nos amez et feaulx, les généraulx conseillers par nous ordonnez sur le faict et gouvernement de noz finances, salut et dillection.

Comme puis naguères ayons ordonné estre faict ung bel et sumptueulx ediffice au lieu et place de Chambort et de ce baillé la charge à notre amé et féal conseiller et chambellan ordinaire François de Pontbriand, chevalier, seigneur de la Villatte, pour tenir le compte et faire le paiement duquel ediffice soit besoin commettre et députer quelque bon personnage à nous agréable, sûr et féable, savoir faisons que nous, ce considéré, et la grant confiance que nous avons de la personne de notre très cher et bien amé maistre René Clotet, secrétaire de notre très chère et tres amée dame et mère et de ses sens, suffisance, loyaulté, expérience et bonne dilligence, icelluy pour ses causes … avons commis, ordonné et dépputé … à tenir le compte et faire le paiement dudit édiffice, qui sera au lieu et place de Chambort, lesquelz paiemens il sera tenu faire des deniers qui, pour ce, ont été ou seront ordonnez et selon et ensuivant les deubz (sic) et marchez et ordonnances de notre dit conseiller le seigneur de la Villatte ou par celluy ou ceulx qu’il y commettra, pour ce qu’il n’y pourra pas toujours vacquer, et par le controulle de botre cher et bien amé tel que à ce faire avons commis et commettons par ces présentes pour la dite charge et commission avoir, tenir, et doresnavant exercer par ledit Clotet aux gages et tauxations qui, pour ce, luy seront par nous tauxéz et ordonnez et aux droicts, prouffictz et esmouluments accoustumez.

Sy voullons et vous mandons que, en faisant le dit René Clotet joir et user de ceste présente commission et à luy obeyr et entendre de tous ceulx ainsi qu’il appartiendra des choses touchans et consernans ladite commission, vous souffrez et permettez que tous les paiemens qu’il aura faictz
touchant ledit édiffice par ordonnance dudit seigneur de la Villatte, ses commis et contreroullez par ledit tel, estre allouez es comptes et rabatuz de sa recepte par noz amez, etc (sic), ausquels nous mandons, etc. (sic). Car tel, etc. (sic), non obstant, etc. Donné, etc (sic)

Bibl. Nat. Fr. 5500 F. 23

 

7 septembre

Délégation de la surintendance du château de Chambord par François de Pontbriand.

François de Pontbriand, seigneur de Nyeul et de la Villatte, cappitaine des châsteaulx de Blois et de Loches et maistre d’hostel ordinaire du Roy, grant chambellan de la Royne, certiffions à tous qu’il appartiendra que pour la bonne vraye et entière confiance que nous avons des personnes de Mathurin Viart, Seigneur d’Arbouville, maistre de la chambre des comptes de Blois, et maistre Pierre de Douet, Seigneur de la Cochetière, nous, yceulx Viart et du Douet, avons commis et commettons par ces présentes, et au lieu de nous et en notre absence, signer les roolles et acquitz pour le faict du bastiment que le roy a ordonné faire au lieu de Chambort, avec la superintendance et regart sur tous et chacuns ouvraiges, journées, vacations, achapts de matières et aultres choses qui pevent toucher et concerner le faict dudit bastiment.

Et les acquitz et roolles signés d’iceulx Viart et du Douet, en tant que à nous pevent toucher, les ratiffions et approuvons et voulons estre ratiffiez partout où il appartiendra, en ensuyvant le povoir et puissance à nous donné et octroyé par ledit Seigneur.

En tesmoing de ce, avons signées ces présentes et scellées de nostre scel.

Faict le VIIeme jour de Septembre, l’an mil cinq cens et dix neuf.

F. de Pontbriand

Bibl. Nat. Fr. 26117 : 433 sceau enlevé

Partager

Shares